** تحذير: إلى كل الحبّيبة المعتقدين في عيد الحب.. لا تقرؤوا هذا الموضوع.. الموضوع فيه سم قاتل.
--------------------
وسط الأحداث المأساوية التي يشهدها العالم بشكل عام.. وحالة الغليان التي تعيشها مصر بشكل خاص.. من ارتفاع أسعار وبطالة وفقر وجوع وهطل وهرتلة وخلافه.. يأتي يوم 14 فبراير ليضرب بكل شيء عرض الحائط.. ويخرج لسانه لكل البني آدمين في العالم بشكل عام وفي مصر تحديدًا.. ويقول لهم: "أنا هنا اهو.. الدكر فيكم يطلعلي!".
وسط الأحداث المأساوية التي يشهدها العالم بشكل عام.. وحالة الغليان التي تعيشها مصر بشكل خاص.. من ارتفاع أسعار وبطالة وفقر وجوع وهطل وهرتلة وخلافه.. يأتي يوم 14 فبراير ليضرب بكل شيء عرض الحائط.. ويخرج لسانه لكل البني آدمين في العالم بشكل عام وفي مصر تحديدًا.. ويقول لهم: "أنا هنا اهو.. الدكر فيكم يطلعلي!".
ولما كان العبد لله مش "مرتشبط" فإن يوم 14 فبراير بالنسبة له يشبه تمامًا يوم 5 ديسمبر.. وكلاهما يشبه أيضًا يوم 31 سبتمبر إن وجد.. بل يشبه أي يوم من باقي أيام السنة الـ365 وربع زي ما علمونا في كتب الدراسات الاجتماعية.. كلها أيام ربنا.
ولكن بما إننا شعب "زايط".. "زيّاط".. "مزياط".. "زييط".. "زيوط" أي يموت في الزيطة.. فإننا ما بنصدق نلاقي عيد.. يخصنا ميخصناش أهو عيد والسلام.. يعني إجازة.. وهدايا.. وفلوس.. يطلع بقى عيد الحب.. عيد الخشب.. عيد طائر البطريق.. عيد الكركدن الأحمر.. يطلع زى ما يطلع.. المهم إنه عيد.. لازم نحتفل بيه.. وكل عيد وله طقوسه!
تخيّل.. عيد الحب الذي نحتفل به الآن.. مسلمين على مسيحيين على يهود على بوذيين على كونفوشوسيين.. يعود أصله إلى أسطورة!
بذمتك.. مش مكسوف من نفسك لما تحتفل بعيد أصله أسطورة؟ ودي مش بس أسطورة واحدة.. دي كمان ليها أكتر من رواية!
يعنى مثلاً.. لو جيت دلوقتي وقلتلك إنه في يوم 25 طهارش "مارس حاليًا" سنة 1290 ق.م. وفى بلد اسمها طرطور الفشني.. كان فيه راجل طيب اسمه سعيد.. سعيد الملزّق.. وكان تاجر مخدرات كبير.. محدش عارف يمسكه ولا يعمل معاه الغدر.. من الآخر يعني كان تاجر مخدرات مخلّص وعارف هو بيعمل إيه.. وفى يوم من الأيام جه سعيد الملزّق وفى عملية تهريب بودرة كبيرة أوي من إياهم طب عليه البوليس.. واتمسك الملزّق.. يا حبة عين أمه وهو في عز شبابه وحيويته ونضارة بشرته.. راح في شربة مية.. وتم إعدامه على الخاذوق!
ولما كانت شخصية سعيد الملزّق من الشخصيات المهمة والمرموقة في طرطور الفشني وبالتالي فله مكانة كبيرة بين أهله وجيرانه، فإنهم صنعوا له تمثالاً يشبهه تمامًا وهو جالس على الخاذوق.. وأصبح التمثال يمثل أحد أهم المعالم السياحية في طرطور الفشني وضواحيها، وأصبح له زواره من جميع أنحاء العالم.. حاجة زى الحج كده.. وفى كل يوم 25 طهارش يجتمع الناس أسفل تمثال الملزّق ويقلعوا هدومهم ويغطوا أجسامهم بأوراق الشجر، ثم يبدؤون بأكل الكبدة نيئة احتجاجًا على قرار إعدام الملزق.. ثم يتم اختيار واحد من خيرة الحشاشين في طرطور الفشني ويُعدم على الخاذوق.. ويصبح ذلك أكبر - وآخر - شرف يناله ذلك الشاب في حياته.. ويقدم نفسه للخاذوق في اعتزاز وفخر.. ولا كأنه ميت شهيد!
طبعًا لا فيه طرطور الفشني ولا فيه طهارش ولا فيه خواذيق.. كل ده أسطورة.. بس هو واحد طقت في دماغه وقال لك أعمل إشاعة وأنشرها في العالم.. سجل الهباب اللي فات ده في مذكراته.. وحلف إنه حصل.. فهل من المنطق أن يأتي الناس من بعده ليحتفلوا بيوم 25 مارس؟!
هذه الحكاية تشبه حكاية القسيس فالانتاين.. مع استبدال الزمن بالزمن والشخصية بالشخصية، لكن الثابت في الحالتين هو الأسطورة.
طب خد دي.. يعود الاحتفال بعيد الحب إلى بعض المعتقدات الرومانية في العصور القديمة.. حيث كانوا يعتبرون يوم 15 فبراير مهرجان إله الخصوبة.. أي والله إله الخصوبة.. ومفيش خطأ مطبعي ولا حاجة، وكان البيه "إله الخصوبة" يقف نصف عارٍ دائمًا ويلبس جلد الماعز!
خلاصة القول إننا عندنا استعداد نحتفل بذكرى أي سنجاب برى كانت له أيام سودة في حياته عاش فيها على قفا الناس وكل من وراهم حلاوة.. واحنا بقى ناخد أسطورته وحكاياته الفكسانة كلام مقدس له أهميته ومصداقيته!
طيب اشمعنى القديس فالانتاين وإله الخصوبة اللي الناس يحتفلوا بيهم.. هم أحسن من جدي في إيه؟ والله من بكرة الصبح لاكون عامل عيد يضرب الفالانتاين 100 جزمة.. عيد جدي.. الشناوي الكبير.. هو مش أقل من أي حد معمول له عيد.. وبما إن جدي الله يرحمه ويبشبش الطوبة اللي تحت راسه كان بيحب البصارة فأنا هسميه عيد البصارة.. هي مش أسطورة؟ يعني أقول اللي أنا عاوزه.. خلاص يبقى هو عيد البصارة.. وهعمله يوم....... يوم إيه يوم إيه.. آه.. هو ده.. هعمله يوم 10 أغسطس.. طبعًا هتسألني وتقول لي اشمعنى؟ وطبعًا هجاوبك وهقول لك مش عارف! بس اليوم ده أنا حاسس إنه كويس.. أنا حر.. عيد جدي وأنا حر فيه!
وفى كل يوم 10 أغسطس هاقدم طلب إحاطة في مجلس الشعب بإن الناس كلها تستحمى بالبصارة.. مش تاكلها.. لأنها لو كلتها فده عادي جدًا مفيهوش أي أسطورة.. أما لو استحمت بيها فهو ده التجديد.. الابتكار يا عزيزي.. ولازم يستحموا بيها وهى سخنة.. بدل هنعمل عيد يبقى نعمله على أصول.. يا إما مانعملوش أحسن!
1000 رحمة ونور عليك ياجدي.. لو تصحى دلوقتي وتعرف إن فيه عيد متفصل مخصوص علشانك أكيد كنت هتفرح أوي.. واحتمال من الفرحة كنت تموت تاني.. ياللا هتاخد زمنك وزمن غيرك يعني؟ كفاية عليك عيد البصارة.. السخنة!
